நான்கே வயதான சிறுவன் அறியாத் தனமாகவும் ஆத்திரத்திலும் தன் தந்தையையே சுட்டுக் கொன்றுள்ள அவலம் சவூதி அரேபியாவில் சம்பவித்துள்ளது.சவூதி அரேபியாவின் தென்பகுதியில் ஜீஸான் என்னும் நகரம் உள்ளது. இந்நகரில் பிளே ஸ்டேசன் வாங்கித்தர மறுத்த தன் தந்தையை நான்கே வயதான சிறுவன் ஆத்திரத்தில் சுட்டுக் கொன்றுள்ளான். இச்சம்பவம் அந்நகரில் பெரும் அதிர்ச்சியைத் தோற்றுவித்துள்ளது.தன் தந்தையுடனும், குடும்ப உறுப்பினர்களுடனும் வழக்கமான அங்காடி உலா நேற்று சென்றிருக்கையில், நான்கே வயதான அந்தச் சிறுவன் தந்தையிடம் ப்ளே ஸ்டேசன் வாங்கித் தரும்படி கேட்டிருக்கிறான். சிறு வயது என்பதால் அதற்கு மறுப்பு தெரிவித்த தந்தை வேறு ஏதேனும் வாங்கிக் கொள்ளும்படி கூறியிருக்கிறார். இருந்தும் ப்ளே ஸ்டேசன் தான் வேண்டும் என்பதில் தீவிரமாக இருந்த சிறுவன், வீட்டுக்கு வந்த பின்னர், உடை மாற்றச் சென்ற தந்தை துப்பாக்கியை வைப்பதைப் பார்த்துவிட்டு, அதைப் பாய்ந்து எடுத்து மிக அருகில் இருந்தபடி தந்தையை நோக்கிச் சுட்டிருக்கிறான். குண்டு பாய்ந்ததால் அந்தத் தந்தை உடனடியாக இறப்பைத் தழுவினார். காவல்துறை விசாரணை நடந்து வருகிறது. இச்செய்தியை அரபக நாளேடுகள் தெரிவித்துள்ளன.
No comments:
Post a Comment